जीवन भर हमरे साथ रह्यू

Memory of Chinmaya University

जीवन भर हमरे साथ रह्यू 

जीवन भर हमरे साथ रह्यू 

हमरे भइया भउजी अच्छे 

उनके सबके प्यारे बच्चे 

सब तोहका चाची मानत थीं 

फोटू देखतै पहिचानत थीं 

फोनवा पै हमसे कहत रहें 

हमहू मिलबै अब चाची से 

छोटकी बहिनी हमसे बोलीं 

बतियाइब नवकी भाभी से 

मम्मिउ तोहका अपनाय लिहीं 

पहिलेन ऊ लड्डू खाय लिहीं 

पापा का जइसेन खबर मिली 

अँखियन के तारा होय गयू 

हमरे घर मा सब अच्छे हैं 

जेतना मन चाहै पड्यू - लिख्यू 

जीवन भर हमरे साथ रह्यू 

जीवन भर हमरे साथ रह्यू 

ना चाही हो घोड़ा, हाँथी 

हमका चाही जीवनसाथी 

जेहिके साथे जीवन काटब 

आपन सुख - दुःख संग संग बाँटब 

लड़ि मरि के खाब - खियाइब सब 

सपना हम पूर कराइब सब 

दुनिया वालेन के काम अहै 

वै चिल्लइहैं, चिल्लाए द्या 

हरदम हम तोहरे साथ रहब 

उनका सबका तू जाये द्या 

ई वादा है हमार तुमसे 

आपन बियाह होई झम से 

दुनिया केतनीउ शैतान बनै 

केतनौ तुमका परशान करै 

हम जउन कही बस सुनत रह्यू 

छोड़िउ ना संगे - साथ बह्यू 

जीवन भर हमरे साथ रह्यू 

जीवन भर हमरे साथ रह्यू 

तोहरौ आपन बिचार होइहैं 

जे जगह - जगह पै समझइहैं 

मिलके जीवन - गति बढ़त रही 

सीढ़ी दर सीढ़ी चढ़त रही 

जेतनी उन्नति हम कइ पउबै 

ओतने ऊपर तोहका लउबै

तोहका हम आपन मान लेहे 

तोहका आखिर पहिचान लेहे 

बस हमहीं बोली ठीक नहीं 

बोला आखिर आजादि अहा 

हमरे घर आवै का तोहका 

अब पापा के औलादि अहा 

मन मा जब जउन रहै तोहरे 

कहि दिहू न ज्यादा कष्ट सह्यू 

ई कउनो नहीं जरूरी है 

हम जउन कही तू वही कह्यू 

जीवन भर हमरे साथ रह्यू 

जीवन भर हमरे साथ रह्यू